ठाव नाही घेतला केव्हा मनाचा

ठाव नाही घेतला केव्हा मनाचा

भरवसा द्यावा तरी कोणी, कशाचा ?

कासवे हसतात आता शर्यतीला

जन्म हा म्हणतो नको, वंशज सशाचा

नावही बहुधा पुढे बुडणार आहे,

नेमका करणार तू धावा कुणाचा ?

केवढी जादू तुझ्या हातात आहे,

नाचवत आहेस घोडा कागदाचा

चिंब भिजलो केवढे छत्रीत आपण

दोष नाही त्यात काही पावसाचा

रंगली बागेत चर्चा ही दिवसभर

काढला काटा कुणी रात्री फुलाचा ?

काळजी घे नीट आता आपलीही

काळ आहे फार उलट्या काळजाचा ...

~ अनिल विद्याधर आठलेकर